12 دليل انه انا وانت وهو وهي عرب

سجِّل! أنا عربي ...ورقمُ بطاقتي خمسونَ ألفْ...وأطفالي ثمانيةٌ ..وتاسعهُم.. سيأتي بعدَ صيفْ! فهلْ تغضبْ؟ سجِّلْ! أنا عربي الله يرحمك يا محمود درويش بالنسبة إلي كنت شاعر مبدع وأبدعت بهاي القصيدة ،بتعرفوا إنه أحلى ما في الانسان يكون عنده هوية تعبر عنه ،وتراث حضاري يفتخر فيه وتاريخ عريق يمجد ابطاله وهادا موجود عنا إحنا العرب بكفي إنه إحنا أمة محمد (صلى الله عليه وسلم). بس بتعرفوا كمان إنه إحنا العرب عنا أشياء بتميزنا عن كل هالعالم بس مع الأسف مش كلها حلوة ويمكن أنا أشوفها مو حلوة وغيري يشوفها حلوة هادا شي نسبي بس والله لو حطوا العربي بين ناس اوروبيين والا أفارقة والا أمريكيين والا آسيويين وعاشروا شوي بدون ما يحكي إنه عربي بعرفوا إنه عربي وهلأ خلينا نشوف بعض هاي الأشياء اللي بتميزنا.
1)

إذا شفت واحد بده يقطع الشارع غصب عن السيارة اللي قدامه وبجاكر فيها بكون عربي وبأكد عروبته أكتر لما يكون جنبه جسر المشاة أو بعيد عنه متر ومع هيك بقطع الشارع من تحت الجسر.وبحب يتخالف وبعمل حوادث وبقطع الإشارة وهيه حمرا لإنه دايما مستعجل فهوه عربي.
2)

أما إذا رحت تشتري خبز والاإشي من السوق بتشوف ناس فوق بعضهم ومعطلين البياع على يلا يا زلمة ،يلا خلصني،ولك أخرتنا،وبعدين معك،وانت زيح من وجهي ،وانت روح انصرف وكل هالبلاوي ولا إنهم يحترموا حالهم ويوقفوا بطابور...
3)

والا الشوارع الوسخة والحدائق اللي مليانة زبالة مش لإنه ما في عمال نظافة والا ما في حاويات ومكبات بس لإنه إحنا عرب بنكب الزبالة جنب الحاوية والله الأسبوع الماضي كان قدامي بنتين ماسكين كيس بزر وببزروا بنص الشارع وجنبهم في سلة زبالة والأدهى من هيك إنه كان عامل النظافة قاعد بكنس بالشارع ولم الزبالة اللي تحتهم شفتوا كيف إحنا العرب؟؟؟؟
4)

إزا سمعت حديث شباب مع بعض يا الله بتقرف حياتك لإنهم ما بحكوا مع بعض الا ازا سبوا على بعض حكي بنحكى وما بنحكى فأكيد بتكون هاي شلة شباب عربي والأغلب الموضوع عن البنات وتزبيط البنات.
5)

ويا سلام على قعدة النسوان العربية بتهوس بتبلش من اعمليلنا فنجان قهوة لهاي وسخة وهاي اتطلقت وهاي ما بتعرف تطبخ وهاي اشترت وباعت واللي بسم البدن أكتر إنها بتكون تحكي على وحدة كانت عندها قبل بيوم أو أفطرت عندها الصبح يعني إحنا شعب بمية وجه مع إنه دينا الاسلامي حرم الغيبة والنميمة بس العرب بتقلب قعدتهم حش بحش ببعض.
6)

وكله كوم وحبنا للأكل والنهم كوم تاني، يا إمي ما أفجعنا ،وأكلاتنا إزا ما كانت بالسمن البلدي والرز واللحمة والدجاج ما بتكون أكلة والعربي عنده تقليد خاص الفطور فلافل وفول وأيام الاسبوع اكلات لازم يكون فيها رز أما يوم الجمعة يوم العز"المنسف والكبسة والاوزي والمندي والمفتول والصواني بتشتغل ولازم يكون السدر مرشوم بالدجاج او اللحوم والا ما أحلانا إزا رحنا عزيمة عند ناس يا الله شو بنعجب عليهم أكلهم مو زاكي مع إنا نسفنا السدورة،واللحمات كانوا قلال وما أنتفهم حطولنا بس سلطة ما جابوا لبن وشربونا قهوة بسرعة بدهم يروحونا وكل هاي القصص اللي ما إلها طعم.
7)

وهلأدور القنوات العربية اللي كلها تقليد بتقليد بتبلش كلها بكلمة star ازا كانت فنية ،واكيد نقلا عن قنوات اوروبية ،وبرامج السياسة كلها بتشترك في إشي واحد أنه كلها حكي بحكي والكل بده يعلي صوته أكترمن التاني وما حدا بسمع حدا والبرامج الرياضية موضوعها واحد شغب الملاعب وسبب الأداء السيء في مباراة وإقالة مدرب والحكم مدفوعله،وبرامج الموضة والأزياء كلها بتدعو لتجميل الشنعات بجيبوا وحدة قرفانة من حالها وبدها تغير حالها مع أطنان مكياج وتقليل من الاواعي بتصير ملكة جمالوهادا دليل إنه احنا عرب.

وما أزكى شبابنا العربي ازا الشب تركته صاحبته بروح بتدمر وبشغل السيارة على ال 180 بفكر حالو دونجوان عصره وبخلصلوا 10 باكيتات دخان وبكسر تلفونه وبسبله كم مسبة محترمة وبقضي طول الليل بالشوارع على أطلال ليلى وبسمع اغنية سهرانة طول الليل.أما البنت ازا تركهاحبيبها يا عيني عليها ما معها سيارة تخمس وتسدس بتروح على البيت وبتحشر حالها بالحمام وهات يا دموع وبعدين بتروح على الغرفة وكمان هات يا دموع وبتشغل المسجل على مخادع وبايع وبياع القلوب، وكرهتك وطبعا بتقضي سهرتها بالغرفة والدموع تسح من عينيهاويا حزركم شو بيعملوا تاني يوم بروح هوه بجاكرها وبصاحب صاحبتها او أيا وحدة بلاقيها بوجهه وهيه قال يعني بتحرق دمه فبتروح بتحكي مع غيره شايفين العرب ما أفهمهم؟؟؟؟؟؟؟؟.
9)

ولبسنا صرعاته كتيرة كلها محزق وملزق وملبط وألوان ما إلهاش علاقة ببعض والشعر كله جل أو واكس والبنت مسشورة شعرها من 10 أيام وما غسلت شعرها والزيت بنقط منه وبتروح عالجامعة أطنان مكياج ولابسة كعب 15 سم الله أكبر والله ما بعرف كيف بقدروا يمشوا فيه ومستعدة تلبس تنورة قصيرة بعز الشتا والبرد ولو تموت من بردها بس مشان كم دنب وديل حيلحقوها شفته شو بعملوا العرب؟؟؟؟؟
10)

ولما حدا يسئ لدينا ونبينا ما بنتحرك صح بنستتفه أمور متل ما نشتري بضاعة منهم وما بتفرئ معانا مع إنه أكتر شي بيضربهم أنه نقاطعهم إحنا لإنه همه مو ملاقيين حدا يشتري بضاعتهم غيرنا.
11)

واحترامنا للوقت فوق العادة بنعطي موعد بنوصل بعد الموعد بساعتين والباقي عندكم.حتى أزا بدنا سيارة اسعاف أوقات بتوصل بعد ما الواحد تطلع روحه.
12)

والا أعراسنا يا حبيبي عليها بدها موضوع كامل بس بدي أحكي عن قصة النقوط والله إنها بتخزي بحس الناس بتروح غصب عنها لإنها بدها تدفع مصاري وبيجوا حاسبين حسابهم إنه رح ترجعلهم هاي المصاري بعرس إبنهم وبسيروا يشوفوا مين أجا ومين ما اجا مشان ما يروحوله وينقطوا لإنه ما إجا ونقط وكله بالآخر على خمس دنانير (والله فضايح).

ما بدي أطول أكتر من هيك مع إنه عندي كتيييييييييييير يا عرب والله لازم نصحى ونشوف لأبعد من عيونا ونشوف بعين المستقبل بس بجميع الأحوال الحمدلله إني عربية ودمي عربي وأصلي عربي لإنه اللي عنا أهون كتيييييييييير من بلاوي حضارات وشعوب تانية.

hi تمنى ما شئت لكن اتخذ سبباً أكتب ما شئت لكن لا تستفز أحداً إقرأ ما شئت لكن لا تنسى النقد أبداً إنتقد كما شئت لكن لا تطعن أحداً
مرحبا دلوعة الاردن .. في البداية .. حابة أشكرك على المقالة الحلوة .. الي بتوصف الواقع المبكي المضحك .. لإنه (شر البلية ما يضحك) ... بس أنا الي تعقيب صغير عليها .. يعني في عدة نقاط إنتي ذكرتيها على أساس إنها بتوصف العرب، مع العلم إنها موجودة في شعوب تانية وبصورة أوضح من عنا ... يعني مثلا في النقطة رقم 4 قلتي إنو حديث الشباب عنا بقرف .. مع إنو كمان الشباب الأجانب (وممكن حتى البنات) بتلاقي منهم بناقشو مواضيع قمة في الوساخة وبصوت عالي وما بهمهم حدا .. أما بالنسبة للنسوان في النقطة رقم 5 فهمي في جميع دول العالم بتدور بقعداتهم عن حكي القيل والقال والفتن وكل هاي القصص (وهادا شي مؤسف طبعا) .. أما قولك بإنو العرب بياكلو كتيير فهادا بخليني أتوقع إنك ما تعاملتي مع كتير أجانب (مجرد توقع) لإنو الأجانب مفاجيع بصورة ما ممكن تتوقعيها؛ يعني لو عزمتيهم عندك ممكن يقومو بكل الأكل المحطوط ويقولولك هاتي كمان ولو ما خلصو ما عندهم مشكلة بإنهم يقولولك إنو تلفيلهم إياه مشان ياخدو معهم لإنو بالنسبة الهم هالشي مافيو خجل، ولسا العرب لما حدا بيعزمهم بردولو العزومة وما بقصرو أما الأجانب "لو" ردو العزيمة بكونو طابخين أكل على قد صحن كل واحد ومش مستعدين يغلبو حالهم كتير يعني راس مالها الشغلة عندهم ستيك مشوي وخضار مسلوقة مع بطاطا مهروسة، أو حتى ممكن يعملو العزيمة على بواقي الأكل الي عندهم يعني ال( .. أما بالنسبة للنقطتين 8 و 9 فهيي "أساسا" تقليد للغرب يعني الشباب و البنات بشوفو إنو الممثلين بالأفلام والمسلسلات الأجنبية هيك بيعملو ولإنهم بشوفوهم كتيير كوول فبقلدوهم يعني هيي أساسا مش صفة عربية هيي صفة منسوخة من الغرب (وهادي أكيد مش شغلة بنفتخر فيها، لإنها تقليد أعمى بتدل على انعدام شخصيات جزء كبير من الشباب العرب وهادا لحالو بدو مقالة ) .. وحتى احترام الوقت يعني صحيح إنو في نسبة كبيرة من العرب ما بيحترمو بس كمان في أجانب عندهم نفس المشكلة .. وبالنسبة لهدايا الأعراس فكمان الأجانب عندهم إياها، يعني عندهم ما بصير إنو حدا يحضر العرس من دون ما يجيب هدية للعروسين، وحتى مع كرت الدعوة بكونو العرسان حاطين اسم المحل يلي لازم الناس يجيبو منو الهدايا وهمي بكونو عاملين ليستا بهادا المحل بكل الأغراض يلي بدهم إياها والناس بتختار منها ... أما بالنسبة لباقي النقاط .. فأنا بتفق معك فيها 100% ... خلاصة يلي حكيتو .. إنو أنا ما بنكر وجود هاي الصفات بالعرب بس هيي كمان موجودة عند كتيير شعوب غيرنا .. لكن المفروض نحنا كمسلمين إنو نكون قدوة لغيرنا وما نتحلى بهاي الصفات ..

في النهاية .. بشكرك كتيير على المقالة الرائعة .. والأسلوب المتميز .. وأنا كل يلي حكيتو هادا هو مجرد اختلاف بالآراء (وإذا خبصت شوي بالحكي لا تواخذوني؛ لني تعبانه شوي سامحني ) .. وأنا كتير بحترم رأيك يا علا؛ فيا ريت تتقبلي رأيي بصدر رحب .. وبرجع بقولك : وأنا كتيير آسفة لإني طولت عليكم ...

تحياتي للجميع

مشكور دلوعة الاردن

12 دليل انه انا وانت وهو وهي عرب

12 دليل انه انا وانت وهو وهي عرب

رد: 12 دليل انه انا وانت وهو وهي عرب